سبع ساعات

سبـــع ساعــات اســـولف واستخف دمـــــــي
وهي تسمعني وتضحك ومبسوطه على الآخر


سبع ساعات اعلمها عن احزاني وعن همي
واسولف عن حكايا الطفل كان صار هالشاعر


سبع ساعات تتساقط حروف الصدق من فمي
على صحرى مسامعها سحاب العشق متناثــر


سبع ساعات وتحلف لي براس العشق وتسمي
تقول أنت الوحيد اللي ملكني حبك الساحـــر


سبع ساعات ونادتني باسمه ماهو باسمي
تنادي فهد واسمي أنا ياللأســـــف جابـــر


تشنج كل شي كان حولي ومسمعي يدمــــــي
ركز خنجر فهد في مسمعي من صوتها الخادر


تخدر فكري وجسمي وذاب بداخلي عظمـــــي
وصرت اسمع صدى صوتٍ يردد غلطة الشاطر


يردد غلطة الشاطر بعشرة واقعي وحلمي
وترددها زوايا غرفتي والواقـــع الغــــادر


كثير اصوات شقت جلدي اللي يحتضن عظمي
وصراخ الباب والدولاب والشباك والســـاتــــر


وونات القلم والدفتر اللي يلتفـــــت يمــــي
وخايف وش ابي اكتب بوسطه من هنا لباكر


وكانت ساكته وصوت النفس من خشمهالخشمي
ربع ساعاه وبحة صوت قالت:خير وش صار


وطرا في بالي عبدالله وخالد واحمد ونشمي
ولآخرهم فهد تسعه وانا مدموغه العاشر


وقلت ابداً مغيرالخير ولكن امسحي رقمي
اكيد انه فهد جالس سبع ساعات وهو ناطر


وقالت لي: رجاءً أو اقولك ..طير ياعمي
مسوي حضرتك في هالزمان العاشق الطاهر


وقالت لي: اقول!وقلت: انا بقول وذا علمي
عجب هالناس وش هالناس تخطي وبالخطى تكابر


أنا يابنت بنثر لك حياتي واجمعي لمّي
بعضه بنثره في مسمعك وهالحين ومن خاطر


ترا عمري أنا تسعه وعشرين وكذا رسمي
ولكن عشت ايامي دبلها مقبل وعــــامــــر


اصيل وكل اصيل مايبي مدحي ولا ذمــــي
وسبع انعام في هالناس اخص الحامد الشاكر


أنا من نجد وربعي هم عتيبه وخالي الدحمي
"وبرقا" هم لحمي ودمي وأنا من روق ومع ناصر


أنا جابر ولد هايف وسلم الطيب هو سلمي
ابوي اللي مربيني على الجزلات واتفاخر


أنا راعي مجاهيم يشع بفخذها وســـــــمي
وراعي خيل وراعي بير وبيتٍ عاشقه ضمي


وشمس تشرق وتوقف على راسي وانا صابر
عرق وجهي يصب وامسحه بشماغي وكمــي


وألد عيوني عن ناسٍ سرقني يمها الناظر
ولأني بالغرور احكي ولكن واثق وقادر


وأنا رجال هاوي للقمم ويقودني عزمي
وابي ارقى على راس الجبل وانتي مع الحادر


عرفتي ليه أنا طاهر؟لأنك همي وغمي
ولأن الدنيا في عيني جبل نرقاه ونغامر


يابنت الناس شفتي كيف بليّا سلاح مانرمي
ولا نوقف بوجه البندق المليان ونخاطــــر


خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخـــاســـــر


وقالت لي فمان الله شعلت النار في جسمي
فمــــان الله يالطـــاهر ومثلك قله ونــــادر


ورحت آخذ كتاب الله واحلّف بالكتاب: امي
لو ان اسمي فهد بالله ماكان احلى من جابر..!!!

***********************
منـــــــــقــــــــــــــــــول

لقد حازت على إعجابي....فأتمنى أن تعجبكم

الله يخليك ويعطيك العافية

وهذه شهادة اعتز فيها